ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធានអាជ្ញាធរជាតិដោះស្រាយវិវាទក្រៅប្រព័ន្ធតុលាការ អញ្ជេីញជាអធិបតីក្នុងពិធីបិទវគ្គបណ្តុះបណ្តាលមន្ត្រីសម្រុះសម្រួលដោះស្រាយវិវាទនៃ អ.ដ.ក. ជំនាន់ទី១
នាព្រឹកថ្ងៃសុក្រ ១២ រោច ខែផល្គុន ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី៥ ខែមេសា ឆ្នាំ២០២៤ អគ្គលេខាធិការដ្ឋាននៃ អ.ដ.ក. ដោយសហការជាមួយបណ្ឌិត្យសភាភូមិន្ទយុត្តិធម៌កម្ពុជា បានរៀបចំកម្មវិធីបិទវគ្គបណ្តុះបណ្តាលសម្រាប់មន្ត្រីសម្រុះសម្រួលដោះស្រាយវិវាទនៃ អាជ្ញាធរជាតិដោះស្រាយវិវាទក្រៅប្រព័ន្ធតុលាការ ជំនាន់ទី១ ក្រោមអធិបតីភាពដ៏ខ្ពង់ខ្ពស់ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធានអាជ្ញាធរជាតិដោះស្រាយវិវាទក្រៅប្រព័ន្ធតុលាការ។ កម្មវិធីនេះ ក៏មានការអញ្ជើញចូលរួមជាគណ: អធិបតី ពីសំណាក់ ឯកឧត្តម ហួត ហាក់ រដ្ឋមន្ត្រីក្រសួងអធិការកិច្ច និងជាអនុប្រធាននៃ អ.ដ.ក., ឯកឧត្តម លោកជំទាវ ជាអនុប្រធាន និងសមាជិកនៃ អ.ដ.ក., ឯកឧត្តមបណ្ឌិតរដ្ឋ ឈន ព្រលឹង ប្រធានរាជបណ្ឌិត្យសភាភូមិន្ទយុត្តិធម៌កម្ពុជា, ថ្នាក់ដឹកនាំនៃអគ្គលេខាធិការដ្ឋាននៃ អ.ដ.ក. និងថ្នាក់ដឹកនាំនៃ ប.ភ.យ.ក. ព្រមទាំងមន្ត្រីសម្រុះសម្រួលដោះស្រាយវិវាទ ដែលបានបញ្ចប់ការបណ្តុះបណ្តាលដោយជោគជ័យចំនួន ៨៩ រូប (ស្ត្រី ១៧ រូប)។ នៅក្នុងវគ្គបណ្តុះបណ្តាលតម្រង់ទិស នេះ , ក្រៅពីជំនាញច្បាប់ មន្ត្រី សម្រុះសម្រួល ដោះស្រាយ វិវាទបានទទួលការបណ្តុះបណ្តាលលេីមុខវិជ្ជាគ្រឹះសំខាន់ៗ ទាក់ទងនឹងជំនាញនៃការដោះស្រាយវិវាទ , ចិត្ត សាស្ត្រ ក្នុងការសម្រុះសម្រួលវិវាទ, សាសនា និងការដោះស្រាយវិវាទ, ក្រមសីលធម៌ និងក្រមប្រតិបត្តិរបស់មន្ត្រីសម្រុះសម្រួលដោះស្រាយវិវាទ និងការរៀបចំកំណត់ហេតុព្រមព្រៀងបញ្ចប់វិវាទ ជាដេីម។ ក្នុងពិធីនេះផងដែរ មន្ត្រីសម្រុះសម្រួលដោះស្រាយវិវាទ ជំទាន់ទី១ ដែលបានបញ្ចប់ការបណ្តុះបណ្តាលដោយជោគជ័យ បានទទួលនូវវិញ្ញាបនបត្រជំនាញសម្រុះសម្រួលដោះស្រាយវិវាទពី ឯកឧត្ដម កេីត រិទ្ធ ឧបនាយករដ្ឋមន្ត្រី រដ្ឋមន្ត្រី ក្រសួង យុត្តិធម៌ និងជាប្រធាន អ.ដ.ក . និងពី ឯកឧត្ដម ហួត ហាក់ រដ្ឋមន្ត្រី ក្រសួង អធិការកិច្ច និងជាអនុប្រធាន អ.ដ.ក. ផងដែរ។
