អាជ្ញាធរជាតិដោះស្រាយវិវាទក្រៅប្រព័ន្ធតុលាការ (អ.ដ.ក.) ដោយសហការជាមួយអង្គការអុកស្វាមប្រចាំកម្ពុជា បានរៀបចំសិក្ខាសាលាពិគ្រោះយោបល់ ស្តីពីការរៀបចំគម្រោងសម្រាប់ការដោះស្រាយវិវាទជូនប្រជាពលរដ្ឋរស់នៅតំបន់ដាច់ស្រយាល និងតំបន់ជនជាតិដើមភាគតិច
នាព្រឹកថ្ងៃព្រហស្បត្តិ៍ ១ រោច ខែពិសាខ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី២៣ ខែឧសភា ឆ្នាំ២០២៤ អាជ្ញាធរជាតិដោះស្រាយវិវាទក្រៅប្រព័ន្ធតុលាការ (អ.ដ.ក.) ដោយសហការជាមួយអង្គការអុកស្វាមប្រចាំកម្ពុជា បានរៀបចំសិក្ខាសាលាពិគ្រោះយោបល់ ស្តីពីការរៀបចំគម្រោងសម្រាប់ការដោះស្រាយវិវាទជូនប្រជាពលរដ្ឋរស់នៅតំបន់ដាច់ស្រយាល និងតំបន់ជនជាតិដើមភាគតិច។ សិក្ខាសាលានេះ ត្រូវបានរៀបចំឡើងក្រោមអធិបតីភាព លោកជំទាវ ជា វាសនា រដ្ឋលេខាធិការក្រសួងយុត្តិធម៌ និងជាសមាជិក អ.ដ.ក. តំណាងដ៏ខ្ពង់ខ្ពស់ ឯកឧត្តមឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធាន អ.ដ.ក. និងដោយមានការចូលរួមពីសំណាក់ ឯកឧត្តម ប៉ូច សោភ័ណ សមាជិក អ.ដ.ក., ឯកឧត្តម ឃ្លោក ដារ៉ា សមាជិក អ.ដ.ក. និងឯកឧត្តម យ៉ម ផារ៉ូត អគ្គលេខាធិការនៃ អ.ដ.ក. ព្រមទាំងថ្នាក់ដឹកនាំ និងមន្ត្រីនៃអគ្គលេខាធិការដ្ឋាននៃ អ.ដ.ក., តំណាងអង្គការអុកស្វាមប្រចាំកម្ពុជា, តំណាងសហភាពអឺរ៉ុបប្រចាំកម្ពុជា (EU), តំណាងការិយាល័យឧត្តមស្នងការទទួលបន្ទុកសិទ្ធិមនុស្សនៅកម្ពុជា (UN-OHCHR) ព្រមទាំងតំណាងអង្គការសង្គមស៊ីវិល និងដៃគូអភិវឌ្ឍន៍ សរុបប្រមាណជា ៥០ រូប។ សិក្ខាសាលានេះ ត្រូវបានរៀបចំឡើងក្នុងគោលបំណងប្រមូលធាតុចូលសំខាន់ៗ ពីតួអង្គពាក់ព័ន្ធ ដើម្បីធ្វើឱ្យគម្រោងនេះកាន់តែមានភាពគ្រប់ជ្រុងជ្រោយ និងអាចធានាបាននូវប្រសិទ្ធភាពខ្ពស់ក្នុងការអនុវត្ត ក៏ដូចជាដើម្បីពិនិត្យលទ្ធភាពធ្វេីកិច្ចសហការជាមួយគ្រប់តួអង្គពាក់ព័ន្ធ ក្នុងការអនុវត្តគម្រោងដ៏សំខាន់នេះ ។ គួរបញ្ជាក់ផងដែរថា អ.ដ.ក. មានគោលដៅជាចម្បងក្នុងការចុះដោះស្រាយវិវាទជូនប្រជាពលរដ្ឋនៅមូលដ្ឋា ន សំដៅ លេីកកម្ពស់សិទ្ធទទួលបានយុត្តិធម៍ និងបង្ខិតការផ្តល់សេវាយុត្តិធម៍ឱ្យកៀកនឹងប្រជាពលរដ្ឋ ហេីយគម្រោងចុះដោះស្រាយវិវាទជូនប្រជាពលរដ្ឋរស់នៅតំបន់ដាច់ស្រយាល និងតំបន់ជនជាតិដើមភាគតិច គឺជាគម្រោងអាទិភាពមួយរបស់ អ.ដ.ក. ដែលរៀបចំទ្បេីង ដេីម្បីជាប្រយោជន៍របស់ប្រជាពលរដ្ឋ ពិសេស ជនងាយរងគ្រោះ ស្របតាមគោលនយោបាយរបស់រាជរដ្ឋាភិបាល។
