លទ្ធផល និងសកម្មភាពការងារសំខាន់ៗ របស់ការិយាល័យតំណាង អ.ដ.ក. ប្រចាំខេត្តទាំង៤ នៅភូមិភាគឦសាន ក្រោយដាក់ឱ្យដំណើរការរយៈពេល ៥០ ថ្ងៃ
លទ្ធផល និងសកម្មភាពការងារសំខាន់ៗ របស់ការិយាល័យតំណាង អ.ដ.ក. ប្រចាំខេត្តទាំង៤ នៅភូមិភាគឦសាន ក្រោយដាក់ឱ្យដំណើរការរយៈពេល ៥០ ថ្ងៃ
=========
អាជ្ញាធរជាតិដោះស្រាយវិវាទក្រៅប្រព័ន្ធតុលាការ (អ.ដ.ក.) បានដាក់ឱ្យដំណើរការនូវការិយាល័យតំណាង អ.ដ.ក. ប្រចាំនៅខេត្តភូមិភាគឦសាន ទាំង៤ រួមមាន ខេត្តក្រចេះ, ខេត្តស្ទឹងត្រែង, ខេត្តរតនគិរី និងខេត្តមណ្ឌលគិរី កាលពីថ្ងៃទី១ ខែសីហា ឆ្នាំ២០២៥ ។
គិតមកដល់ថ្ងៃទី២០ ខែកញ្ញា នេះ គឺមានរយៈពេល ៥០ ថ្ងៃ ដែលការិយាល័យតំណាង អ.ដ.ក. បានដំណេីរការ។ តើក្នុងរយៈពេល ៥០ថ្ងៃ នេះ ការិយាល័យតំណាង អ.ដ.ក. ប្រចាំខេត្តភូមិភាគឦសាន សម្រេចបានលទ្ធផលសំខាន់ៗ អ្វីខ្លះ?
១- ចំណាត់ការសំណុំរឿង ៖ ការិយាល័យតំណាងទាំង ៤ បានទទួលសំណុំរឿងសរុបចំនួន ១០២ ករណី ដោយក្នុងនោះ ខេត្តក្រចេះមានចំនួន ១១ករណី, ខេត្តស្ទឹងត្រែង មានចំនួន ១៧ករណី, ខេត្តរតនគិរី មានចំនួន ៣២ករណី និងខេត្តមណ្ឌលគិរី មានចំនួន ៤២ករណី។ សំណុំរឿងចំនួន ១០ ត្រូវបានដោះស្រាយបញ្ចប់ដោយជោគជ័យ ហេីយសំណុំរឿងមួយចំនួនទៀត កំពុងត្រូវបានបន្តដោះស្រាយ ដោយប្រធានការិយាល័យតំណាង អ.ដ.ក. ប្រចាំខេត្តទាំង ៤ ទាំងការដោះស្រាយដោយផ្ទាល់នៅការិយាល័យ និងចុះដោះស្រាយដល់មូលដ្ឋានរបស់ប្រជាពលរដ្ឋ។
២- ការបណ្តុះបណ្តាលពង្រឹងសមត្ថភាពដល់អាជ្ញាធរមូលដ្ឋាន : ក្នុងក្របខ័ណ្ឌនៃកិច្ចសហការជាមួយអាជ្ញាធរមូលដ្ឋាន និងអង្គការដែលជាដៃគូ រួមមាន អង្គការ Oxfam, UNDP និងអង្គការនារីដេីម្បីសន្តិភាព, អ.ដ.ក. តាមរយ:ការិយាល័យតំណាងរបស់ខ្លួន បាននិងកំពុងរៀបចំជាបន្តបន្ទាប់នូវវគ្គបណ្តុះបណ្តាលលើជំនាញសម្រុះសម្រួលដោះស្រាយវិវាទ ដល់មន្ត្រីនៃមន្ទីរ-អង្គភាពពាក់ព័ន្ធនៅតាមខេត្តគោលដៅទាំង ៤។ ជាក់ស្តែង កាលពីថ្ងៃទី១៥-១៧ ខែកញ្ញា ឆ្នាំ២០២៥ កន្លងទៅថ្មីៗនេះ អ.ដ.ក. បានសហការជាមួយរដ្ឋបាលខេត្តស្ទឹងត្រែង និងអង្គការអុកស្វាមប្រចាំកម្ពុជា បានរៀបចំវគ្គបណ្តុះបណ្តាលលើជំនាញសម្រុះសម្រួលដោះស្រាយវិវាទ ដល់មន្ត្រីនៃមន្ទីរ-អង្គភាពពាក់ព័ន្ធជុំវិញខេត្តស្ទឹងត្រែង ប្រមាណជា ៥០ រូប។
៣- អ.ដ.ក. ដោយមានកិច្ចសហការពីអាជ្ញាធរមូលដ្ឋាន និងអង្គការជាដៃគូ បាននិងកំពុងបន្តជំរុញការផ្សព្វផ្សាយអំពីសារៈសំខាន់ និងអត្ថប្រយោជន៍នៃយន្តការដោះស្រាយវិវាទក្រៅប្រព័ន្ធតុលាការ តាមរយៈការសម្រុះសម្រួលផ្សះផ្សាដល់អាជ្ញាធរមូលដ្ឋាន, អាជ្ញាធរប្រពៃណី និងប្រជាពលរដ្ឋនៅមូលដ្ឋាន សំដៅចូលរួមដល់ការកាត់បន្ថយការកកស្ទះសំណុំរឿងនៅតុលាការ និងធានានូវភាពសុខដុមរមនាក្នុងសហគមន៍។
សូមបញ្ជាក់ផងដែរថា ការិយាល័យតំណាង អ.ដ.ក. ដេីរតួនាទីជាបណ្តាញការងាររបស់ អ.ដ.ក. និងមានសមត្ថកិច្ចសំខាន់ ៗ ចំនួន ៣ គឺ (ទី១)- ទទួលពាក្យបណ្តឹងពីប្រជាពលរដ្ឋ ដែលស្នើសុំផ្សះផ្សាវិវាទ, (ទី២)- ធ្វើការសម្រុះសម្រួលដោះស្រាយវិវាទ និង (ទី៣)- សហការជាមួយរដ្ឋបាលថ្នាក់ក្រោមជាតិ ដើម្បីផ្សព្វផ្សាយអំពីយន្តការដោះស្រាយវិវាទរបស់ អ.ដ.ក. និងបណ្តុះបណ្តាលជំនាញនៃការដោះស្រាយវិវាទជូនដល់មន្ត្រីថ្នាក់ក្រោមជាតិ។
* លោកអ្នក អាចទំនាក់ទំនង៖
- ខេត្តក្រចេះ៖ ទីតាំងស្ថិតនៅភូមិក្រគរ សង្កាត់ក្រគរ ក្រុងក្រចេះ ខេត្តក្រចេះ។ លេខទំនាក់ទំនង៖ ០៧១ ៥៣៣ ៤៤៧៧។
- ខេត្តស្ទឹងត្រែង៖ ទីតាំងស្ថិតនៅភូមិព្រែក សង្កាត់ស្ទឹងត្រែង ក្រុងស្ទឹងត្រែង ខេត្តក្រចេះ។ លេខទំនាក់ទំនង៖ ០៧១ ៦៣៣ ៤៤៧៧។
- ខេត្តរតនគិរី៖ ទីតាំងស្ថិតនៅភូមិ៧មករា សង្កាត់ឡាបានសៀក ក្រុងបានលុង ខេត្តរតនគិរី។ លេខទំនាក់ទំនង៖ ០៧១ ៧៣៣ ៤៤៧៧។
- ខេត្តមណ្ឌលគិរី៖ ទីតាំងស្ថិតនៅភូមិដោះក្រមុំ សង្កាត់សុខដុម ក្រុងសែនមនោរម្យ ខេត្តមណ្ឌលគិរី។ លេខទំនាក់ទំនង៖ ០៧១ ៨៣៣ ៤៤៧៧។
