ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធានអាជ្ញាធរជាតិដោះស្រាយវិវាទក្រៅប្រព័ន្ធតុលាការ (អ.ដ.ក.) បានអញ្ជើញជាអធិបតីដឹកនាំកិច្ចប្រជុំលើកទី១១ នៃ អ.ដ.ក.
ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធានអាជ្ញាធរជាតិដោះស្រាយវិវាទក្រៅប្រព័ន្ធតុលាការ (អ.ដ.ក.) បានអញ្ជើញជាអធិបតីដឹកនាំកិច្ចប្រជុំលើកទី១១ នៃ អ.ដ.ក.
======================
ថ្ងៃអង្គារ ៨កើត ខែអស្សុជ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី៣០ ខែកញ្ញា ឆ្នាំ២០២៥, ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធានអាជ្ញាធរជាតិដោះស្រាយវិវាទក្រៅប្រព័ន្ធតុលាការ (អ.ដ.ក.) បានអញ្ជើញដឹកនាំកិច្ចប្រជុំលើកទី១១ របស់អាជ្ញាធរជាតិដោះស្រាយវិវាទក្រៅប្រព័ន្ធតុលាការ ដែលកិច្ចប្រជុំនេះ ក៏មានការអញ្ជើញចូលរួមពីសំណាក់ ឯកឧត្តម សុខ សូកេន រដ្ឋមន្ត្រីក្រសួងអធិការកិច្ច និងជាអនុប្រធាននៃ អ.ដ.ក., ឯកឧត្តម លោកជំទាវ ជាថ្នាក់ដឹកនាំ និងសមាជិកនៃ អ.ដ.ក. ព្រមទាំងថ្នាក់ដឹកនាំនៃអគ្គលេខាធិការដ្ឋាននៃ អ.ដ.ក. និងមន្ត្រីពាក់ព័ន្ធមួយចំនួនទៀត។
កិច្ចប្រជុំលើកទី ១១ នេះ ត្រូវបានរៀបចំឡើងដើម្បីពិនិត្យ និងពិភាក្សាលើរបៀបវារៈសំខាន់ចំនួន ២ គឺ៖
ទី១- វឌ្ឍនភាពការងាររបស់ អ.ដ.ក. ដែលសម្រេចបាន នៅចន្លោះកិច្ចប្រជុំលើកទី១០ និងលើកទី១១ នៃ អ.ដ.ក.។
ទី២- ពិនិត្យ និងសម្រេចលើសំណេីសុំផ្តល់នីតិសម្បទាជាមន្ត្រីសម្រុះសម្រួលដោះស្រាយវិវាទនៃ អ.ដ.ក. ជំនាន់ទី២ ចំនួន ៤០ រូប។
នៅក្នុងកិច្ចប្រជុំលើកទី១១ នេះ ជាមួយនឹងការវាយតម្លៃខ្ពស់លេីលទ្ធផលការងារដែល អ.ដ.ក. សម្រេចបានកន្លងមក ឯកឧត្តម ឧបនាយករដ្ឋមន្ត្រី និងជាប្រធាន អ.ដ.ក. ក៏បានផ្តល់អនុសាសន៍ណែនាំសំខាន់ៗ មួយចំនួនដល់អគ្គលេខាធិការដ្ឋាន និងតួអង្គពាក់ព័ន្ធ ដូចខាងក្រោម :
១- ត្រូវបន្តការយកចិត្តទុកដាក់លើការពង្រឹងជំនឿទុកចិត្តរបស់សាធារណជនមកលើស្ថាប័ន អ.ដ.ក. ដោយត្រូវធានាឱ្យបាននូវការគោរពនូវក្រមសីលធម៌ និងក្រមប្រតិបត្តិ របស់មន្ត្រីសម្រុះសម្រួលដោះស្រាយវិវាទ។
២- ត្រូវបន្តជំរុញការផ្សព្វផ្សាយអំពីយន្តការដោះស្រាយវិវាទក្រៅប្រព័ន្ធតុលាការ ឱ្យបានទូលំទូលាយ និងឱ្យដល់មូលដ្ឋានភូមិ-ឃុំផ្ទាល់ សំដៅធ្វើយ៉ាងណាឱ្យប្រជាពលរដ្ឋនៅក្នុងមូលដ្ឋាន អាចទទួលបានព័ត៌មាន និងយល់ដឹងអំពីសារសំខាន់នៃយន្តការ អ.ដ.ក. ពិសេស ប្រជាពលរដ្ឋរស់នៅខេត្តទាំង ៤ ក្នុងតំបន់ភូមិភាគឦសាន ដែលជាខេត្តគោលដៅមួយរបស់ អ.ដ.ក.។
៣- ពិនិត្យលទ្ធភាពរៀបចំនូវសិក្ខាសាលាឆ្លុះបញ្ចាំងនូវបទពិសោធន៍ អំពីភាពជោគជ័យ (Success Story) ក្នុងការដោះស្រាយវិវាទក្នុងក្របខ័ណ្ឌ អ.ដ.ក. ដោយមានវត្តមានចូលរួមពីតួអង្គពាក់ព័ន្ធនានា ដើម្បីជំរុញឱ្យមានការប្រើប្រាស់យន្តការដោះស្រាយវិវាទក្នុងក្របខ័ណ្ឌ អ.ដ.ក. ឱ្យកាន់តែទូលំទូលាយ។
៤- នាពេលខាងមុខ ត្រូវសិក្សាអំពីគម្រោងបង្កើតឱ្យមានការិយាល័យតំណាង អ.ដ.ក. ប្រចាំនៅថ្នាក់តំបន់ និងគម្រោងបង្កើតឱ្យមាន មន្ត្រីសម្រុះសម្រួលដោះស្រាយវិវាទក្នុងក្របខ័ណ្ឌ អ.ដ.ក. នៅតាមសាលាដំបូងរាជធានី-ខេត្ត។
ទន្ទឹមគ្នានេះ អង្គប្រជុំ អ.ដ.ក. ក៏បានសម្រេចផ្តល់នីតិសម្បទាជូនដល់មន្ត្រីសម្រុះសម្រួលដោះស្រាយវិវាទ ជំនាន់ទី២ ចំនួន ៤០ រូប ដែលបានបំពេញគ្រប់លក្ខខណ្ឌគុណវុឌ្ឍិ ដែលកំណត់ដោយច្បាប់ ដើម្បីអាចចូលបំពេញការងារជាអ្នកដោះស្រាយបញ្ចប់វិវាទជូនប្រជាពលរដ្ឋ។
