ឯកឧត្តម ប៉ូច សោភ័ណ អនុរដ្ឋលេខាធិការក្រសួងយុត្តិធម៌ និងជាសមាជិក អ.ដ.ក. បានអញ្ជើញជាអធិបតីក្នុងពិធីបិទវគ្គសិក្ខាសាលាបណ្តុះបណ្តាល ស្តីពីការពង្រឹងសមត្ថភាពបុគ្គលិកគ្រឹះស្ថានធនាគារ និងហិរញ្ញវត្ថុ ដើម្បីបង្កើនប្រសិទ្ធភាពនៃការសម្រុះសម្រួលផ្សះផ្សាវិវាទ នៅក្នុងវិស័យធនាគារ និងហិរញ្ញវត្ថុនៅកម្ពុជា
ឯកឧត្តម ប៉ូច សោភ័ណ អនុរដ្ឋលេខាធិការក្រសួងយុត្តិធម៌ និងជាសមាជិក អ.ដ.ក. បានអញ្ជើញជាអធិបតីក្នុងពិធីបិទវគ្គសិក្ខាសាលាបណ្តុះបណ្តាល ស្តីពីការពង្រឹងសមត្ថភាពបុគ្គលិកគ្រឹះស្ថានធនាគារ និងហិរញ្ញវត្ថុ ដើម្បីបង្កើនប្រសិទ្ធភាពនៃការសម្រុះសម្រួលផ្សះផ្សាវិវាទ នៅក្នុងវិស័យធនាគារ និងហិរញ្ញវត្ថុនៅកម្ពុជា
-------------------------------------
នារសៀលថ្ងៃសុក្រ ទី១៧ ខែតុលា ឆ្នាំ២០២៥, ដោយទទួលការអនុញ្ញាតដ៏ខ្ពង់ខ្ពស់ពី ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធាន អ.ដ.ក., ឯកឧត្តម ប៉ូច សោភ័ណ អនុរដ្ឋលេខាធិការក្រសួងយុត្តិធម៌ និងជាសមាជិក អ.ដ.ក. បានអញ្ជើញជាអធិបតីក្នុងពិធីបិទវគ្គសិក្ខាសាលាបណ្តុះបណ្តាលស្តីពីការពង្រឹងសមត្ថភាពបុគ្គលិកគ្រឹះស្ថានធនាគារ និងហិរញ្ញវត្ថុ ដើម្បីបង្កើនប្រសិទ្ធភាពនៃការសម្រុះសម្រួលផ្សះផ្សាវិវាទ នៅក្នុងវិស័យធនាគារ និងហិរញ្ញវត្ថុនៅកម្ពុជា។
ពិធីនេះ ក៏មានការអញ្ជើញចូលរួមជាគណៈអធិបតីពីសំណាកលោកស្រី ផល ឆាមល៍ ធានី អគ្គលេខាធិការនៃសមាគមធនាគារនៅកម្ពុជា, លោក កាំង តុងងី អគ្គលេខាធិការស្តីទី នៃសមាគមមីក្រូហិរញ្ញវត្ថុកម្ពុជា, លោកជំទាវ ឃុត ស៊ាងអៃ អគ្គលេខាធិការរងនៃ អ.ដ.ក., លោក យន់ សុវណ្ណារ៉ា ប្រធាននាយកដ្ឋាន និងដោយមានការអញ្ជើញចូលរួមពីតំណាងស្ថាប័នធនាគារ និងគ្រឹះស្ថានមីក្រូហិរញ្ញវត្ថុ ចំនួនប្រមាណជា ៣០០ នាក់។
ក្នុងវគ្គសិក្ខាសាលាបណ្តុះបណ្តាលនេះ ឯកឧត្ដម ប៉ូច សោភ័ណ រួមនឹងវាគ្មិនដែលជាថ្នាក់ដឹកនាំនៃអគ្គលេខាធិការដ្ឋាននៃ អ.ដ.ក. និង មន្ត្រីសម្រុះសម្រួលដោះស្រាយវិវាទនៃ អ.ដ.ក. បានធ្វេីបទបង្ហាញចែករំលែកអំពី ដំណើរការនីតិវិធីក្នុងក្របខណ្ឌនៃ អ.ដ.ក. រាប់ចាប់តាំងពីដំណាក់កាលទទួលពាក្យបណ្ដឹងរហូតដល់ការចេញនូវកំណត់ហេតុព្រមព្រៀងបញ្ចប់វិវាទ ព្រមទាំងបច្ចេកទេសគន្លឺះនៃការសម្រុះសម្រួលដោះស្រាយវិវាទក្នុងគោលបំណងបញ្ជ្រាបការយល់ដឹងអំពីបែបបទ និងនីតិវិធីនៃការសម្រុះសម្រួលផ្សះផ្សាវិវាទក្នុងក្របខណ្ឌនៃ អ.ដ.ក. ជូនដល់បុគ្គលិកគ្រឹះស្ថានធនាគារ និងហិរញ្ញវត្ថុ ដែលបាននិងកំពុងប្រេីប្រាស់សេវាដោះស្រាយវិវាទនៃ អ.ដ.ក.។
