ឯកឧត្តមបណ្ឌិត ជិន ម៉ាលីន រដ្ឋលេខាធិការប្រចាំការ និងជាអនុប្រធានប្រចាំការនៃ អ.ដ.ក. បានអញ្ជើញចូលរួមពិសារអាហារការងារ ( Working Lunch ) ជាមួយស្ថាប័ន UN នៅកម្ពុជា និង ដៃគូអភិវឌ្ឍន៍ ដើម្បីពិភាក្សាលើយន្តការដោះស្រាយវិវាទក្រៅប្រព័ន្ធតុលាការនៅកម្ពុជា និងកិច្ចសហការ
នាពេលថ្ងៃត្រង់ ថ្ងៃអង្គារ៍ ៤រោច ខែជេស្ឋ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២៥ ខែមិថុនា ឆ្នាំ២០២៤ នៅសណ្ឋាគារ Raffle Le Royal ឯកឧត្តមបណ្ឌិត ជិន ម៉ាលីន រដ្ឋលេខាធិការប្រចាំការ និងជាអនុប្រធានប្រចាំការនៃ អ.ដ.ក. រួមនិងសហការីជាថ្នាក់ដឹកនាំនៃក្រសួងយុតិ្តធម៌ តាមការចាត់តាំងរបស់ ឯកឧត្តម កើត រិទ្ធ ឧបនាយករដ្ឋមន្រ្តី រដ្ឋមន្រ្តីក្រសួងយុត្តិធម៌ និងជាប្រធាន អ.ដ.ក.បានអញ្ជើញចូលរួមពិសារអាហារការងារ ( Working Lunch ) ជាមួយស្ថាប័នអង្គការសហប្រជាជាតិប្រចាំនៅកម្ពុជា និងបណ្តាស្ថាប័នជាដៃគូអភិវឌ្ឍន៍ ដើម្បីពិភាក្សាអំពីយន្តការដោះស្រាយវិវាទក្រៅប្រព័ន្ធតុលាការនៅកម្ពុជា និង កិច្ចសហការ។ នៅក្នុងជំនួបពិសារអាហារការងារនេះ ឯកឧត្តមបណ្ឌិត ជិន ម៉ាលីន បានធ្វើបទបង្ហាញអំពីសារសំខាន់នៃការបង្កើតនូវអាជ្ញាធរជាតិដោះស្រាយវិវាទក្រៅប្រព័ន្ធតុលាការ (អ.ដ.ក.) និងបេសកកម្មចម្បងរបស់ស្ថាប័នជាតិនេះ រួមនិងគម្រោងសំខាន់ៗ ដែល អ.ដ.ក. នឹងដាក់ចេញនាពេលខាងមុខ សំដៅពិនិត្យលទ្ធភាពបង្កើនកិច្ចសហប្រតិបតិ្តការជាមួយគ្រប់តួអង្គពាក់ព័ន្ធលើការពង្រឹងយន្តការដោះស្រាយវិវាទក្រៅប្រព័ន្ធតុលាការនៅកម្ពុជា។
